Қазақстандық теннисші Александр Бублик әлемнің бірінші ракеткасы Янник Синнердің допингке байланысты үш айға шеттетілуіне қатысты өз ойын білдірді.
Теннисшілердің кәсіби қауымдастығы (ATP) хабарлағандай, Синнер допинг ережелерін бұзғанын мойындап, WADA-мен келісімге келген. Соның нәтижесінде италиялық спортшы 2025 жылдың 9 ақпанынан 4 мамырына дейін дисквалификацияға ұшырады. Бірақ ол сәуір айынан бастап қайтадан жаттығуға кірісе алады. Сондықтан Үлкен дулыға турнирлерін толық өткізу мүмкіндігі бар.
"Егер бәріміз Синнер сияқты келіссөз жүргізе алсақ, тамаша болар еді. Егер келісу мүмкіндігі бар болса, ол барлық спортшыға берілуі керек. Олар өздері ашық айтты – келісімге келдік деп. Қалай? Кіммен? Егер бұл жол берілген тәжірибе болса, біз де келіссөз жүргізе аламыз ба? Мені төрт жылға шеттетер еді. Барлық спортшыларға бірдей әділетсіздік жасалып отыр", – деді Бублик BB Tennis-ке берген сұхбатында.
Александр Бублик теннисте айқындықтың жоқ екенін және спортшыларға тең мүмкіндіктер берілуі керек екенін атап өтті.
"Бұл жерде ешқандай ашықтық жоқ. Біз не болып жатқанын түсінбейміз. Бірақ менің оған деген жеке қарсылығым жоқ – ол менің "Үлкен дулығаларымды" тартып алған жоқ. Егер ол допинг қолданса да, қолданбаса да, бәрібір мені жеңеді. Егер мен оның алдында екі-үш финалда жеңілген болсам, әрине, қатты ренжір едім", – деді қазақстандық теннисші.
2024 жылдың жазында Янник Синнердің қанынан тыйым салынған заттар табылған. Осыған байланысты ол ATP Masters 1000 Indian Wells турниріндегі 400 рейтингтік ұпайы мен жүлде қаржысынан айырылған. Көптеген қарсыластары бұл жаза әділетсіз жеңіл деп есептейді.
