Майами қаласында (АҚШ) өтіп жатқан беделді WTA-1000 санатындағы турнирде Қазақстанның үздік теннисшілерінің бірі, әлемнің 24-ракеткасы Юлия Путинцева жарысты күтпеген жерден ерте аяқтады.
Турнирдің екінші айналымында Путинцева америкалық теннисші, әлемнің 90-ракеткасы Тэйлор Таунсендке (Q) 6:7 (2:7), 6:1, 1:6 есебімен есе жіберді. Матч жалпы 2 сағат 8 минутқа созылды.
Кездесу барысында Юлия Путинцева 1 эйс жасап, 1 қос қателікке жол берді және 16 мүмкіндіктен 5 брейк-пойнтты сәтті пайдаланды. Ал Таунсендтің еншісінде – 5 эйс, 6 қос қателік және 11 брейк-пойнттың 5-еуі сәтті орындалды.
Тэйлор Таунсенд үшін бұл жеңіс үлкен жетістік саналады. Ол енді үшінші айналымда Қытай елінің мақтанышы, 2024 жылғы Олимпиада чемпионы және әлемнің 9-ракеткасы Чжэн Циньвэньмен (9) кортқа шығады.
