Әлемнің сегізінші ракеткасы, Қазақстанның атынан өнер көрсететін теннисші Елена Рыбакина WTA тарапынан тыйым салынған хорват бапкер Стефано Вуковпен қайта жаттығу өткізгені белгілі болды.
БАӘ-дегі жекеменшік теннис клубтарының бірінде жарияланған суретте Елена мен Стефано бір кортта жаттығып жүргені көрініс тапты. Бұл жағдай жанкүйерлер арасында үлкен резонанс тудырды.
Еске сала кетейік, WTA Стефано Вуковты этикалық кодексті бұзғаны үшін өз турнирлерінен шеттеткен болатын. Хорват маманға спортшыға дөрекі қарым-қатынас жасады деген айып тағылған. Сонымен қатар олардың арасындағы жеке қарым-қатынас та көпшіліктің сынына ұшыраған.
Алайда Cancha Central платформасының мәліметінше, бұл тыйым ресми WTA турнирлеріне ғана қатысты. Ал жекеменшік жаттығуларға шектеу жоқ. Формалды түрде Еленаның бас бапкері — италиялық Давиде Сангвинетти. Дегенмен Рыбакина мен Вуков арасындағы байланыс үзілмеген.
Елена Рыбакина 2025 жылғы маусымда әзірге бірде-бір титул жеңіп алған жоқ. Соңғы қатысқан турнирі — Miami Open, онда ол екінші айналымда жарыстан шығып қалды. Мұндай нәтиже оның WTA рейтингінде төмендеуіне әкелді.
