Орта салмақта WBO және IBF тұжырымдары бойынша әлем чемпионы атанған қазақ боксшысы Жәнібек Әлімханұлының (17-0, 12 KO) жетістігінің артында оның отбасы — нақтырақ айтқанда, марқұм атасының ерен еңбегі жатыр.
Жәнібектің әжесінің айтуынша, болашақ чемпионның атасы өз қолымен ауырлық құралдарын жасап, алты жасар немересіне жаттығу өткізген:
“Ол кезде оның атасы ескі аккумуляторлардан алынған қорғасынды ерітіп, жүк ретінде пайдаланатын. Сол ауырлықтарды Жәнібектің аяғына байлап, жаттықтыратын. Менің жүрегім ауыратын: “Жетеді, балаға обал емес пе, әлі алтыда ғой” деп ұрыстым. Сонда ол: “Сен не білесің? Ол боксшы болғысы келеді. Боксшының аяғы мықты болуы керек. Сол үшін бәріне төзуі тиіс”, — дейтін”.
Атасы дүниеден өткеннен кейін де Жәнібек өз жеңістері жайлы ең бірінші болып әжесіне хабар береді:
“Қазір өзі маған қоңырау шалып, “Жекпе-жек қалай өтті?” деп сұрайды. Мен: “Керемет болды. Қазақша сөйлегеніңе қуандым. Туған жеріңді ұмытпа. Жыланды — киелі мекен. Сенен бұрын да ұлы адамдар шыққан”, — деп жауап беремін”.
Айта кетейік, Жәнібек Әлімханұлы — Жетісу облысы, Алакөл ауданына қарасты Жыланды ауылында дүниеге келген. Бұл өңірден шыққан мықты спортшылар мен тұлғалар туралы ел аузында аңыз көп. Жәнібек сол мұраны жалғаушы жаңа буын өкіліне айналды.
