Польша астанасы Варшавада "Феликс Штамм" халықаралық турнирі басталды. Бұл дода – биыл тұсауы кесілген World Boxing жобасы аясындағы әлем кубогының екінші кезеңі. Бұған дейінгі бірінші кезең сәуір айында Бразилияда өткен.
Турнирдің алғашқы күнінде шаршы алаңға өзбекстандық боксшы Джахонгир Зокиров шықты. Ауыр салмақ — 90 келіден жоғары категорияда сынға түскен Зокиров жергілікті боксшы польшалық Оскар Коперамен жұдырықтасты.
Жекпе-жек екінші раундта-ақ аяқталды. Зокиров қарсыласын үш мәрте нокдаунға жіберіп, мерзімінен бұрын жеңіске жетті.
Джахонгир Зокировты спорт сарапшылары атақты Баходир Джалоловтың ізбасары ретінде көреді. Джалолов – әуесқой бокста екі мәрте Олимпиада чемпионы, екі дүркін әлем чемпионы және үш рет Азия чемпионы атанған өзбек спортшысы.
