Қазақстандық кәсіпқой боксшы, көрермендер арасында сұлулығымен және шеберлігімен танымал Балауса Мұздыман YouTube-тағы "Спорт Пульс" арнасына берген сұхбатында алдағы жоспарларын айтып берді.
Ол АҚШ-қа жоспарланған сапар туралы алғаш рет ашық айтты.
"Біздің АҚШ-қа сапарымыз шілде айына жоспарланған. 11 шілдеде бокс кеші өтеді. Мен сол кешке ресми шақырту алдым. Жаттықтырушыммен бірге барамыз. Онда жекпе-жектерді көріп, шағын оқу-жаттығу жиынын өткіземіз. Спаррингтер мен жаттығулар болады", — деді Балауса.
Балаусаның кезекті жекпе-жегі 6 маусым күні "Алматы Аренадағы" All Stars Boxing турнирінде жоспарланған. Бұл жолы ол Мысыр елінің өкілі Айя Рамаданға қарсы шығады.
Балауса — қазақстандық кәсіпқой боксшылар арасында танымал әрі медиаға жиі шығатын тұлға. Ол өзінің спорттағы жетістігімен қатар, сыртқы келбетімен де жанкүйерлерді баурап жүр.
