Жекпе-жекке үш ай бойы дайындалып, 15 миллион теңгесін жұмсаған боксшы жекпе-жекке үш күн қалғанда кештің өтпейтінін білген.
Қазақстандық боксшы Мұхит Амантаев «Бірінші бол» подкастында жанкүйерлер мен жұртшылықты елең еткізер шындықты айтты. Оның сөзінше, қарсыласы Зия Алиев жекпе-жекке үш күн қалғанда келісілген төлемді беруден бас тартып, кездесуді болдырмай тастаған. Бұл шешім Амантаевқа материалдық және моральдық үлкен соққы болды.
Мұхит Амантаев бұл кездесуге үш ай бойы: наурыз, сәуір және мамыр айларында күнделікті дайындалғанын жеткізді. Оның айтуынша, бұл кезеңде қаншама энергия, жүйке, денсаулық пен тер төгілген.
«Қаншама еңбегім, қаншама ақшам кетті. Маған қолдау көрсеткен демеушілерім болды. Спорттық мансабым үшін бәрін салдым», — деді Мұхит Амантаев.
Ол жекпе-жек алдында 15 миллион теңгеге жуық қаражат жұмсағанын да жеткізді.
Амантаевтың айтуынша, жекпе-жекке небәрі үш күн қалғанда Зия Әлиев хабарласып, келісілген гонорарды төлемейтінін айтқан. Бұл – Мұхит үшін күтпеген әрі ауыр соққы болған.
«Үш күн қалғанда звандайды. “Мұхит, я тебе не могу заплатить гонорар” дейді. Болды, бәрі сол жерде тоқтады», — деді боксшы.
Мұхит тек қаржылық шығын емес, қоғам тарапынан айтылған сынға да реніш білдірді. Жекпе-жек болмай қалған соң, әлеуметтік желіде «қорықты», «шықпай қойды» деген әңгімелер тараған.
«Алладан басқа ешкімнен қорықпаймыз. Мотиватор дейміз бе, гладиатор, аниматор дейміз бе – қорықпаймыз. Оның техникасы, менің техникам, бокстағы деңгейіміз, спорттық мансабымыз — кім кім екені көрініп тұр ғой. Сондықтан бірден нағыз түсінетін, боксты білетін, боксшылар да, білмейтін адамдар да, көбі айта алады деп ойлаймын», — деді Мұхит Амантаев.
