Қазақстан құрамасының жұлдызы 20 шілде күні Бішкекте алғашқы кәсіби жекпе-жегін өткізеді.
Қазақстан ұлттық құрамасының бас бапкері Қайрат Сәтжанов Сәкен Бибосыновтың кәсіпқой бокстағы дебютіне рұқсат бергенін мәлімдеді. Бұл туралы ол “Спорт Министрі” YouTube арнасында айтты.
“20 шілде күні Сәкен Қырғызстанда шаршы алаңға шығады. Оған Олимпиада жүлдегерлері қатысатын бокс кешіне шақырту келді. Сәкен – өте тәртіпті, еңбекқор бала. Ол менен рұқсат сұрады, мен келісімімді бердім”, – деді Қайрат Сәтжанов.
Сәкен Бибосыновтың кәсіби рингтегі алғашқы қарсыласы — филиппиндік Кристиан Легане (6 жеңіс, 1 жеңіліс, 3 тең ойын, 4 нокаут). Жекпе-жек 20 шілде күні Бішкекте (Қырғызстан) өтеді.
Сәкен – Қазақстан құрамасының көшбасшыларының бірі, Токио Олимпиадасының қола жүлдегері және әлем чемпионатының жеңімпазы.
Аталған бокс кешінде тағы бір жұлдыз — Өзбекстанның екі дүркін Олимпиада чемпионы Хасанбой Дусматов та шаршы алаңға шығады. Ол кәсіпқой бокста 6 кездесу өткізіп, барлығында жеңіске жеткен. Оған тағы бір филиппиндік Ричард Ласпона қарсылас атанбақ.
