Бұл туралы отандасымыздың менеджері ашық айтты.
UFC жұлдызы Шавкат Рахмоновтың менеджері Рубенштейн Рахмонов пен Белал Мұхаммад арасындағы жекпе-жек туралы тараған қауесеттерді жоққа шығарды.
Ruby Sports & Entertainment агенттігінің жетекшісі Дэниэл Рубенштейн, өз компаниясы қазақстандық файтер Шавкат Рахмоновты басқарып отырғанын айта келе, UFC 320 турнирінде Рахмонов пен экс-чемпион Белал Мұхаммад арасындағы жекпе-жек жоспарланып жатыр деген ақпаратты ресми түрде теріске шығарды.
Бұған дейін «Octagon Pulse | UFC MEDIA» атты ресурс бұл жекпе-жек "ресми жоспарға енгізілді" деп жариялаған болатын.
Рубенштейн әлеуметтік желіде жариялаған жазбасында бұл ақпаратқа қатысты ашық әрі өткір пікір білдірді:
«Тамаша. Тағы бір мағынасыз сайт ешқандай дереккөзсіз, ойдан құрастырылған ақпарат таратты. Бұл жалған. Шавкатқа қатысты ешқандай талқылау да болған жоқ. Келесіде сәттілік тілеймін, сау болыңыздар», — деп жазды ол.
Шавкат Рахмонов — UFC-де өнер көрсетіп жүрген ең танымал қазақстандық файтерлердің бірі. Сондықтан әрбір жекпе-жекке қатысты ақпарат жанкүйерлер арасында үлкен қызығушылық пен қызу талқылауға себеп болады. Белал Мұхаммад секілді экс-чемпионмен кездесуі жағдайында бұл — үлкен рейтингтік оқиғаға айналар еді.
