Әйелдер арасында бокстан Қазақстан құрамасының капитаны, үш дүркін әлем чемпионы Назым Қызайбай кәсіпқой боксқа өтуге дайын екенін мәлімдеді.
— Сіз кәсіпқой бокста өнер көрсету туралы айтқан едіңіз. Бұл ойыңыз әлі де бар ма?
— Иә, бұл маған өте қызық. Өзімді кәсіпқой рингте сынап көргім келеді. Қазір байқаған боларсыз, әуесқойлар арасында кәсіпқой бокста жұдырықтасып жүргендер көп. Егер жақсы ұсыныстар түсіп жатса, неге байқап көрмеске? Бұл мен үшін жаңа тәжірибе болмақ. Сондықтан болашақта шынайы әрі лайықты ұсыныстар болса, дайынмын.
Назым кәсіпқой боксқа өту туралы ұсыныстардың бұрын да болғанын айтты. Алайда ол кезде басты мақсат — 2025 жылғы әлем чемпионаты болған.
— Әлем чемпионатына дейін ұсыныстар болды. Бірақ мен үшін басты мақсат — үшінші мәрте әлем чемпионы атану еді. Уақытым тығыз болды, сондықтан кәсіпқой боксқа ауысу туралы ойлаған жоқпын. Бар назарымды чемпионатқа бағыттадым. Мақсатым айқын болды, — дейді Қызайбай.
Кәсіпқой бокста жұдырықтасу үшін Назым Қызайбай Қазақстан бокс федерациясының, ұлттық құраманың бас бапкері мен жеке бапкерінің келісімін алатынын атап өтті.
— Егер жақсы ұсыныстар түссе, алдымен Федерация басшысының және ұлттық құраманың бас бапкерінің рұқсатын сұраймын. Жеке бапкерім де бұл идеяны қолдап отыр. Олимпиадаға дейін біраз уақыт бар. Осы уақыт ішінде кәсіпқой рингте өзімді көрсетіп үлгеремін деп ойлаймын, — деді ол.
Назым Қызайбай биыл Сербияның Ниш қаласында өткен 2025 жылғы әлем чемпионатында алтын жүлде иеленіп, үш дүркін әлем чемпионы атанды. Бұған дейін ол 2014 жылы Оңтүстік Кореяның Чеджу қаласында және 2016 жылы Астанада өткен әлем чемпионаттарында да алтын алған.
