Қазақстандық боксшы Әнел Сақыш Астанада өтіп жатқан World Boxing кубогындағы алғашқы жекпе-жегінде германиялық қарсыласын тас-талқан етіп жеңді.
54 келіге дейінгі салмақ дәрежесінде өнер көрсеткен Әнел 1/16 финалда Германия өкілі Татьяна Обермайермен қолғап түйістірді. Жекпе-жектің екінші және үшінші раундтарында қарсыласы үш рет нокдаунға түсті. Осылайша қазақстандық боксшы бұл кездесуде ешқандай күмән тудырмай, төрешілердің бірауызды шешімімен айқын жеңіске жетті.
“Алғашқы айқаста өзімді жақсы сезіндім. Келесі кезеңдерге де барымды саламын”, — деді Сақыш жеңістен кейін.
Әнел Сақыш – Қазақстан боксының болашағынан зор үміт күттіретін өкілі. Ол былтыр Астанада өткен 22 жасқа дейінгі Азия чемпионатында күміс жүлде иеленді. Жергілікті жанкүйерлерге жақсы таныс боксшы бұл жолы да туған елінде жеңіске жетіп, кубок жолындағы күресті жалғастыруда.
