Астанада өтіп жатқан World Boxing әйелдер арасындағы әлем кубогында қазақ қызы Аида Әбікеева сенімді жеңіске жетті.
Әйелдер арасындағы 65 келіге дейінгі салмақ дәрежесінде өнер көрсететін Аида Әбікеева турнирдегі алғашқы кездесуін Ұлыбритания өкілі Дион Берманға қарсы өткізді.
Жекпе-жек толығымен қазақстандық боксшының бақылауында өтті. Әбікеева төрешілер шешімімен 5:0 есебімен қарсыласын таза ұтты.
Аида осы жеңісі арқылы турнирдің ширек финалына шықты. Ал британиялық боксшы Дион Берман жарысты жүлдесіз аяқтады.
Айта кетейік, 2025 жылдың наурыз айында Аида Әбікеева Сербияның Ниш қаласында әйелдер арасындағы әлем чемпионатында алтын медаль жеңіп алды.
