2024 жылғы Олимпиада чемпионы, қазақстандық ауыр салмақтағы боксшылар үшін нағыз "қорқынышқа" айналған өзбекстандық Лазизбек Муллажонов допинг дауына ілікті. Бұл туралы Халықаралық тестілеу агенттігі (ITA) ресми мәлімдеді.
11 маусым 2025 жылы жарыстан тыс тексеріс барысында алынған допинг сынамасы Муллажоновтың ағзасынан метастерон метаболиттерін анықтаған. Бұл зат WADA-ның тыйым салынған препараттар тізімінде (S1.1 – анаболикалық андрогендік стероидтер) көрсетілген және кез келген уақытта қолдануға рұқсат етілмеген.
Метастерон – бұлшық еттің жылдам өсуін, күш пен төзімділікті арттыратын синтетикалық анаболикалық зат. Оның спорттағы заңсыз пайдалануы ауыр жазаларға алып келуі мүмкін.
Спортшыға бұл жағдай туралы ресми түрде хабарланған. Ережеге сәйкес ол "B" сынамасын талдауды талап етуге құқылы. Егер екінші сынама алғашқы нәтижені растаса, бұл антидопинг ережесінің бұзылуы ретінде тіркеледі. Егер қосымша талдау жасалмаса, нәтиже автоматты түрде расталған болып есептеледі.
Лазизбек Муллажонов – 2024 жылғы Олимпиада чемпионы. Ол бірінші ауыр салмақ дәрежесінде өнер көрсетеді және Қазақстан боксшыларына қарсы сәтті жекпе-жектерімен танымал.
Муллажоновтың допинг дауына іліккені WBC Гран-при турнирінің ширек финалынан тосыннан шеттетілген сәтімен тұспа-тұс келіп отыр. Бұл турнирде өзбек боксшысы басты фавориттердің бірі саналған еді.
