Хабиб Нурмагомедов ММА әлемінде "төңкеріс" жасамақ

Жеңіл салмақ дәрежесі бойынша бұрынғы әлем чемпионы Хабиб ММА спортындағы ережелерге үлкен өзгеріс енгізу қажет деп есептейді. Атап айтқанда, ол жекпе-жектегі раундтарды алып тастауды ұсынады.

"Мен раундтарды мүлде алып тастар едім. Қарапайым жекпе-жек — 15 минут. Титул үшін — 25 минут. Жай ғана октагонға шығып, тоқтаусыз төбелеседі. Раундтардың қажеті қанша?" — деді Хабиб Нурмагомедов блогер Адам Зубайраевқа берген сұхбатында.

Хабибтің жетістігі

• 29 жекпе-жек — 29 жеңіс, жеңіліссіз рекорд (29-0)
• UFC жеңіл салмақ дәрежесіндегі бұрынғы чемпионы
• UFC Даңқ залында ресми түрде қабылданған спортшы
• 2020 жылы кәсіби мансабын аяқтады. Соңғы жекпе-жегінде Джастин Гэтжиді уақытынан бұрын жеңіп, мансаптық нүкте қойды.

Айта кетейік, Хабибтің бұл мәлімдемесі ММА жанкүйерлері мен сарапшылар арасында қызу пікірталас тудырды.