Тарихи жекпе-жекке дайындық жүріп жатыр.
Сауд Арабиясының танымал спорт функционері және промоутері Турки әл аш-Шейх атақты британиялық суперауыр салмақ жұлдыздары – Тайсон Фьюри мен Энтони Джошуа арасындағы жекпе-жекті ұйымдастыру үшін жұмыс жүргізіп жатқанын мәлімдеді.
"Бұл жекпе-жекке бар күшімізді салып дайындалып жатырмыз. Бірақ алдымен боксшыларға формасын қалпына келтіріп, жанкүйерлер үшін қажетті атмосфераны қалыптастыратын дайындық кездесулері қажет", – деді әл аш-Шейх The Ring басылымына.
Энтони Джошуа соңғы рет қыркүйек айында рингке шығып, отандасы Даниэль Дюбуаға нокаутпен есе жіберді.
Тайсон Фьюри желтоқсан айында украиналық Александр Усикпен реваншта жеңіліп қалды.
Бұған дейін бұрынғы абсолютті әлем чемпионы Леннокс Льюис Фьюри мен Джошуаны жекпе-жек өткізуге шақырған. Бұл ұсыныс бокс жанкүйерлерін бірден қызықтырып, әлеуметтік желілерде қызу талқыланды.
