Қазақ спортшысы 17 тамыз таңында америкалық Джозеф Моралеспен кездеседі.
Ертең, 17 тамыз күні қазақстандық аралас жекпе-жек шебері Әліби Ыдырыс (10-0) UFC-мен келісімшарт үшін алғаш рет айқасқа шығып, өзінің мансабындағы тарихи жекпе-жегін өткізеді.
The Ultimate Fighter (TUF) жобасының финалы аясында Әліби Ыдырыс америкалық қарсылас Джозеф Моралеспен (12-2) кездеседі. Айқас АҚШ-тың Иллинойс штатындағы Чикаго қаласында өтетін UFC 319 турнирінде ұйымдастырылады.
Бұл жекпе-жек қазақ спортшысы үшін ерекше мәнге ие, себебі бұған дейін бірде-бір қазақстандық спортшы TUF турнирінің жеңімпазы атанған жоқ.
Әліби Ыдырыс пен Джозеф Моралес арасындағы тартысты айқастың тікелей трансляциясы Қазақстан уақыты бойынша таңғы 03:30-да басталады. Көрермендер жекпе-жекті UFC-тің ресми сайтынан тамашалай алады.
UFC 319 турнирінің негізгі жекпе-жегінде Оңтүстік Африка спортшысы, UFC орта салмақтағы чемпионы Дрикус Дю Плесси (23-2) өз белбеуін қорғау үшін Әмірліктер атынан шығатын ресейлік Хамзат Чимаевқа (14-0) қарсы шығады. Бұл кездесу турнирдің ең үлкен тартысы болмақ.
