Дмитрий Биволдың катмені Дмитрий Лучников "Матч ТВ"-ға берген сұхбатында ресейлік боксшының арқаға жасалған операциядан кейінгі рингке қайта оралуы жайында айтты.
“Операция туралы ақпарат біз үшін тосын болды. Кәсіби спортшылар үнемі жарақат алады. Дайындық әрдайым денсаулыққа әсер етеді. Диманың толық қалпына келуі маңызды. Нақты дерек жоқ, бірақ тәжірибеме сүйеніп айтарым — жекпе-жек ақпанда өтуі ықтимал. Бұл кезеңде әдетте үлкен шоулар ұйымдастырылады”.
2024 жылдың қазан айында Артур Бетербиев Дмитрий Биволды жеңіп, жартылай ауыр салмақта абсолютті чемпион атанған. Алайда 2025 жылдың ақпанында Эр-Риядтағы реваншта Бивол көпшілік шешімімен жеңіске жетіп, чемпиондық белбеулерін қайтарып алды. Дмитрий Биволдың кәсіби рингтегі көрсеткіші: 25 жекпе-жек, 24 жеңіс (12-сі нокаутпен) және 1 жеңіліс.
Бұған қоса, жақында Әлемдік бокс кеңесі (WBC) 34 жастағы Дмитрий Биволды титулынан айырды. Бұл шешім боксшының америкалық Дэвид Бенавидеспен міндетті жекпе-жек өткізуден бас тартуына байланысты қабылданды.
