Қазақстандық файтер Шавкат Рахмоновтың (19-0) келесі қарсыласы белгілі болуы мүмкін. Оның бапкері Эдуард Базров Шон Брэдиге (18-1) қарсы жекпе-жекке қатысты пікір білдірді.
Бұған дейін екі спортшының айқасы 22 қараша күні Катар астанасы Дохада өтетіні айтылған. Алдын ала ақпарат бойынша, бұл кездесу UFC жартылай орта салмақтағы чемпиондық белбеуге үміткерді анықтайды.
Эдуард Базров, Шавкат Рахмоновтың бапкері:
“Бәрі мүмкін. Қазір нақты ештеңе айта алмаймын. Әуелі Шавкатпен сөйлесуім керек”, – деді ол.
Америкалық файтер Шон Брэди бұған дейін UFC-ден ұсыныс алғанын растады. Оның айтуынша, ұйым оған қарсыласының есімін, күнін және орнын хабарлаған.
“Маған бәрін айтты, мен «иә» дедім. Бірақ әлі келісімшартқа қол қойылған жоқ. Қарсы тараптың шешімін күтіп отырмын”, – деді Брэди.
Шавкат Рахмонов соңғы рет октагонға былтыр желтоқсанда шығып, төрешілер шешімімен Иэн Гэрриді жеңген болатын.
Жақында қазақстандық спортшы UFC-дің pound-for-pound (“салмақ дәрежесіне қарамастан үздіктер”) рейтингінің үздік 15 файтері қатарына енді. Бұл – қазақ ММА тарихындағы бұрын-соңды болмаған жетістік.
