Қазақстандық аралас жекпе-жек шебері Шавкат Рахмонов жарақатынан кейін қайтадан толыққанды жаттығу процесін бастады. Бұл туралы оның жаттықтырушысы Эдуард Базров хабарлады. Дегенмен жанкүйерлер күткен Шавкаттың биылғы октагонға оралуы екіталай.
Рахмонов соңғы рет 2024 жылдың желтоқсанында Иан Гэрримен кездесіп, төрешілер шешімімен жеңіске жеткен. Осыдан кейін қазақстандық файтер UFC-дің салмақ дәрежесіне тәуелсіз ТОП-15 рейтингіне кірді. Бұл оның әлемдік деңгейдегі беделін тағы да дәлелдейді.
Эдуард Базров шәкіртінің жағдайы туралы былай деді:
"Шавкат жаттығуды толық көлемде бастады. Қазір денсаулығы жақсы, 100 пайыз дайындыққа кірісе алады. Бірақ жыл соңына дейін жекпе-жекке шығуы екіталай"
Жақында америкалық файтер Шон Брэди қазақстандыққа ашық шақыру тастады. Әлемдік БАҚ-тағы мәліметтерге сәйкес, екі спортшының жекпе-жегі 22 қараша күні Катар астанасы Дохада өтетін UFC турнирінде ұйымдастырылуы мүмкін. Бұл айқаста жартылай орта салмақтағы чемпиондық белбеуге басты үміткер анықталуы ықтимал.
