Орта салмақтағы WBO және IBF тұжырымының чемпионы Жәнібек Әлімханұлы WBC белбеуінің иегері Карлос Адаместі бейнеролик арқылы әжуалады.
Видеода үйректер көрсетілген. Ағылшын тілінде duck сөзі "үйрек" дегенді білдіреді, ал спорттық сленгте ducking – "қашу", "жекпе-жектен жалтару" деген мағына береді.
Жәнібек қарсыласына былай деп үн қатты:
"Эй, WBC чемпионы Карлос Адамес, қайдасың? Рингке шық! Маған менің белбеуім керек!"
Бұған дейін Сауд Арабиясы 22 қараша күні Жәнібек – Адамес арасындағы үш чемпиондық белбеу үшін жекпе-жек өткізуді жоспарлаған. Алайда келіссөздер соңғы сәтте тоқтап қалды. Карлос келісімнен бас тартқан.
Қазақ чемпионы қараша айының басында АҚШ-та рингке шығуды жоспарлап отыр. Қарсыласы әлі нақты бекітілген жоқ, алайда WBO немесе IBF жаңа міндетті қарсылас тағайындауы мүмкін.
Ал Карлос Адамеске қатысты да интрига сақталып тұр. Оның міндетті қарсыласы ретінде тағы бір қазақстандық боксшы – Мейірім Нұрсұлтанов тіркелген. Демек WBC белбеуі үшін де қазақстандық дерби өткізілуі ғажап емес.
