Әйелдер күресінен Қазақстан құрамасының көшбасшыларының бірі Жәмиля Бақбергенова өзінің бапкерлік жолындағы ерекше жағдайын айтты. Қазір ол бірнеше жылдан бері жеке жаттықтырушысы әрі жездесі Нұрсұлтан Теміровтің қоластында дайындалып жүр.
Журналист Ақырыс Сейтқазыға берген сұхбатында Жәмила бұл шешім әпкесі Мәдинаның ұсынысымен қабылданғанын айтты:
“Мәдина екеуміз бірге жаттығамыз, бапкеріміз де ортақ болады деп шештік. Аллаға шүкір, бұл таңдау үшін еш өкінген жоқпын”, — дейді балуан.
Спортшының айтуынша, жездесі кейде қаттырақ сөйлеп қояды. Бұл жағдай Жәмиляның көңіліне тиіп қалатыны бар:
“Жездем қыз балаларды жаттықтырып көрмеген ғой. Кейде қаттырақ айқайласа, "Мен саған ұл емеспін ғой" деп ренжіп қаламын. Бірақ үйде ол өте қалжыңбас, ақкөңіл. Сол үшін мен де кейде тым еркелеп кетемін. Мүмкін, тез ширайын деп қатты сөйлейтін шығар”, — дейді Бақбергенова.
Жәмиля Нұрсұлтан Теміровтің әрдайым өзіне арқа сүйеп, қорғап жүретінін ерекше атап өтті:
“Жаттығу кезінде де, жарыстарда да мені ешқашан ыңғайсыз жағдайда қалдырмайды. Тіпті менікі дұрыс болмаған кезде де көпшілік алдында сөзімді сөйлейді. Тек үйге келген соң қателігімді түсіндіреді. Осындай қолдауы мен қорғауы мен үшін өте қымбат”, — деді спортшы.
