Әйелдер құтқарды: ерлер өзара кездесудің бәрінде бокстан Өзбекстаннан жеңілді

Ливерпульде өтіп жатқан әлем чемпионатында бокстан Қазақстанның әйелдер құрамасы жанкүйерлерге зор қуаныш сыйлады.

60 келі салмақта Виктория Графеева өзбек боксшысы Ситора Турдибекованы сенімді жеңіп, рингте толық үстемдік құрды. Оның әр раунды қарқыны артып, төрешілердің басым көпшілігі қазақстандық спортшыны қолдады.

Ал 65 келіде Аида Әбікеева тарихи сенсация жасады. Ол үш дүркін әлем чемпионы, Олимпиада жеңімпазы Бусеназ Сюрменеліні айқын басымдықпен жеңіп, жартылай финалға жолдама алды. Бұл жеңіс Әбікееваның кем дегенде қола жүлдесін қамтамасыз етті.

Ерлер арасындағы сәтсіздіктер

Өкінішке қарай, ерлер құрамасы дәл осындай жетістікке жете алмады.

• 80 келіде Нұрбек Оралбай өзбек боксшысы Джавохир Умматалиевке жол берді. Қарсылас жекпе-жекті толық бақылауда ұстап, төрешілердің бірауыздан шешімімен жеңіске жетті.
• Ауыр салмақта Сағындық Тоғамбай Турабек Хабибуллаевқа қарсы тұра алмады. Өзбек боксшысы әр раундта айқын басымдық көрсетіп, жартылай финалға шықты.
• 60 келідегі Бейбарыс Жексен Олимпиада чемпионы Абдумалик Халоковпен кездесіп, қарсылық көрсете алмады.
• 65 келіде Ертуған Зейнуллинов біраз қарсылық көрсеткенімен, Асадхуджа Муйдинхуджаевтың тәжірибесі шешуші рөл атқарды.

Жартылай финалға шығу мүмкіндігі әлі де бар: Санжар Тәшкенбай мен Назым Қызайбай. Олар жуырда ширекфиналдық кездесулерін өткізеді.