Танымал боксшының үстінен айқас алдында іс қозғалды

WBA чемпионы, әлемнің ең жарқын боксшыларының бірі Джервонта «Танк» Дэвис үлкен дау ортасында қалды. BoxingScene хабарлауынша, АҚШ-тағы Майами-Дейд округінің сотына Джервонта Дэвиске қарсы азаматтық шаым түскен. Боксшыға адам ұрлау, ұрып-соғу және моральдық қысым көрсету баптары бойынша айып тағылған.

Арыз иесі — спортшының сүйіктісі Кортни Россел. Оның мәлімдеуінше, Дэвис Флорида штатындағы түнгі клубтардың бірінде оны тұншықтырып, итеріп, желкесінен ұрған.

Жекпе-жек тағдыры – белгісіз

Бұл жанжал 14 қарашаға жоспарланған Джейк Полмен айқастың тағдырына тікелей әсер етуі мүмкін.

Most Valuable Promotions (Полдың промоутерлік компаниясы) жағдайды бақылауда ұстап отыр. Инсайдерлердің айтуынша, ұйымдастырушылар үш нұсқаны қарастыруда:

1. Дэвистің орнына басқа қарсылас шығару;
2. Айқасты кейінге шегеру;
3. Ивентті толық тоқтату.

Кей деректер бойынша, стримингтік платформа жекпе-жек трансляциясынан бас тартуы мүмкін, ал шоуға екі аптадан аз уақыт қалды.

Айта кетейік

Бұл — Джервонта Дэвиске қатысты алғашқы құқықтық дау емес. Жыл басында ол тұрмыстық зорлық ісі бойынша тергеуге алынған еді. Сол оқиға Ламонт Роучпен реванш жекпе-жегінің өтпей қалуына себеп болған.

Дэвистің кәсіпқой бокстағы көрсеткіші: 

• 30 жеңіс (28 нокаут);
• 1 тең нәтиже;
• 1 жеңіліс.