Бокстан Париж Олимпиадасының чемпионы, өзбекстандық Лазизбек Муллажонов допинг дауына байланысты үш жылға спорттан шеттетілді.
Халықаралық допинг-тестілеу агенттігінің (ITA) мәліметінше, дисквалификация 2025 жылғы 22 шілдеден 2028 жылғы 21 шілдеге дейін күшінде болады. Сонымен қатар оның барлық нәтижесі 2025 жылдың 11 маусымынан 22 шілдеге дейінгі кезеңге толық күшін жойды.
ITA ресми хабарламасында былай делінген:
«11 маусым 2025 жылы спортшының жарыстан тыс тапсырған допинг сынамасынан метастерон атты тыйым салынған зат табылды. Спортшы өз кінәсін даулаған жоқ. Ерте мойындау арқасында оның жазасы бір жылға қысқартылды. Әйтпесе стандартты төрт жылдық шеттету қолданылатын еді», — деп жазылған агенттік релизінде.
26 жастағы Лазизбек Муллажонов Париж Олимпиадасында ауыр салмақта (92 кг дейін) алтын медаль жеңіп алған еді. Бұған дейін ол 2023 жылғы әлем чемпионатының қола жүлдегері атанған.
