Бұдан бөлек, отандасымыз бір қола медаль алды.
Жапония астанасында өтіп жатқан Сурдлимпиада ойындарында қазақстандық дзюдошылар тамаша нәтиже көрсетті. Отандастарымыз екі алтын және бір қола медаль жеңіп алды. Бұл жеңіс — ел құрамасының тарихындағы ең табысты нәтижелердің бірі.
66 келі салмақта өнер көрсеткен Хамза Гулама финалда алжирлік Бухидель Абдеррахманды иппонмен жеңіп, турнир чемпионы атанды. Оған қоса, 73 келіде ел намысын қорғаған Шадияр Қуандық та финалда оңтүстіккореялық Хванг Хенді таза жеңіспен ұтты. Осылайша, қос дзюдошы алтын медальді қатарынан ел қоржынына салды.
Қазақ дзюдосының табысты күнін Айым Жетпісбаева толықтырды. Ол әйелдер арасындағы сайыста қола медаль иеленіп, Қазақстан құрамасының жалпыкомандалық нәтижесіне үлес қосты.
XXV Сурдлимпиада ойындары 15–26 қараша аралығында Токио қаласында өтуде. Биылғы жарысқа 81 елден 3 000-ға жуық спортшы қатысып жатыр. Бағдарламада 21 спорт түрі бойынша 209 жарыс өткізіледі. Қазақстан сапында 78 атлет өнер көрсетіп, сегіз спорт түрінен бақ сынауда.
