Орта салмақтағы бұрынғы әлем чемпионы Геннадий Головкинмен ұзақ жылдар бойы бірге жұмыс істеген бапкер Абель Санчес GGG-пен серіктестігі кезеңіндегі өзіне ең қатты ұнаған жекпе-жекті атады.
Санчесінің айтуынша, оның жадында ең ерекше сақталған айқас — 2013 жылдың қарашасында америкалық Кёртис Стивенске қарсы өткен жекпе-жек. Ол кезде Головкин Стивенстің жекпе-жекке дейінгі трэштогы мен өзінің аты-жөні жазылған сәндік табытты көрсеткені үшін рингте одан кек алған болатын. Айқас GGG-дің мерзімінен бұрынғы жеңісімен аяқталды — сегізінші раундтан кейін Кёртис Стивенстің бұрышы жекпе-жекті тоқтатуға шешім қабылдады.
"Кёртис Стивенспен болған жекпе-жек маған жекпе-жекке дейінгі оның барлық мәлімдемелерінен кейін Геннадийдің оны жай ғана нокаутқа жіберуді емес, айтқан сөздері үшін жазалауды көздегенін көрсетті. Головкин қарсыласын бірден құлатпай, оған «сабақ беру» үшін соққысының күшін де, қысымын да аздап бәсеңдете алатынын дәлелдеді. Ол жекпе-жек Стивенстің бұрышында тоқтатылды, Геннадийдің кезекті «найзағай соққысынан» кейін емес — ол соққымен бұған дейін өзге қарсыластарын нокаутқа түсірген еді. Бұл айқаста Геннадий қажет болған жағдайда қарқынын бәсеңдетіп, қарсыласын осылайша жазалай алатын жоғары кәсіби шеберлігін көрсетті. Мен үшін бұл Геннадиймен бірге бұрышта өткізген ең есте қаларлық сәттердің бірі болды", — деді Санчес Boxing Social-ға берген сұхбатында.
Геннадий Головкин соңғы рет 2022 жылдың 17 қыркүйегінде Лас-Вегаста рингке шықты. Мексикалық Сауль «Канело» Альвареспен үшінші жекпе-жегінде қазақстандық боксшы төрешілер шешімімен жеңіліп қалды. Бұл жеңіліс оның карьерасындағы маңызды кезең болып, көпшіліктің пікірінше, оның элиталық деңгейдегі белсенділігіне нүкте қойған айқас болды.
Айта кетейік, жақында даңқты қазақстандық боксшы Италияның Рим қаласында өткен World Boxing конгресінде халықаралық ұйымның президенті болып сайланды.
