Ақ үйде айқасатын файтерлердің есімі аталды

UFC комментаторы Джон Аник АҚШ президентінің резиденциясы — Ақ үйде өтетін алғашқы UFC турниріне қатысатын файтерлер туралы пікір білдірді. 

Турнир қашан өтеді?

Ақ үй аумағында ұйымдастырылатын жекпе-жек кеші 14 маусымда өтеді. Аталған турнир АҚШ Тәуелсіздік декларациясына қол қойылғанына 250 жыл толуына орай ұйымдастырылады.

АҚШ президенті Дональд Трамп турнирде 8–9 чемпиондық айқас өтетінін мәлімдеген болатын. Алайда Джон Аник бұл санға сәл күмәнмен қарайтынын жеткізді.

— Сегіз титулдық жекпе-жек — тым идеалистік әрі аса амбициялы жоспар. Бірақ мен Ақ үйдің көгалында 6–7 титулдық айқас өтетініне шынымен сенемін, — деді Аник JAXXON Podcast эфирінде.

Джон Аниктің айтуынша, Ақ үйде өтетін турнирде келесі жекпе-жектерді көруіміз мүмкін:

• Том Аспиналл — Сирил Ган
• Джошуа Ван — Тацуро Тайра
• Хамзат Чимаев (қарсыласы кейін анықталады)
• Алекс Перейра (қарсыласы кейін белгілі болады)
• Петр Ян — Мераб Двалишвили

Айта кетейік, мұндай турнир UFC тарихында бұрын-соңды болмаған.