Алекс Волкановски чемпиондық жекпе-жекте қарсыласын ойсырата жеңді (ВИДЕО)

Австралиялық файтер Алекс Волкановски (27-4) Қазақстан уақытымен бүгін таңертең UFC-дің жартылай жеңіл салмақтағы чемпионы атағын қорғады. Ол бразилиялық Диего Лопеспен (27-7) реванш жекпе-жек өткізді.

Аталған кездесу Сидней қаласындағы Qudos Bank Arena кешенінде өткен UFC 325 турнирінің басты оқиғасы болды және бес раундқа жоспарланған еді. Жекпе-жек толық қашықтыққа созылып, төрешілердің бірауыздан шығарған шешімімен (49-46, 49-46, 50-45) Волкановскидің жеңісімен аяқталды.

Осылайша, Алекс ММА-дегі 28-жеңісіне қол жеткізсе, Диего Лопес кәсіби мансабындағы сегізінші жеңілісін тіркеді.

Еске салайық, Волкановски мен Лопес арасындағы алғашқы жекпе-жек өткен жылдың сәуір айында өтіп, австралиялық файтер бос тұрған чемпиондық белбеу үшін өткен кездесуде де төрешілердің бірауыздан шығарған шешімімен жеңіске жеткен болатын.