Досжан Жұмақан Таиландта өтіп жатқан Futures Cup U-19 турнирінің финалында ринг иесінен басым түсті.
Досжан Жұмақан 60 келіге дейінгі салмақ дәрежесінің финалында таиландтық Сива Чайнаронгпен қолғап түйістірді.
Финалдық кездесу басталысымен жергілікті жанкүйерлердің қызу қолдауына ие болған тай боксшысы бірден белсенді шабуылға көшті. Алайда қазақстандық спортшы қарсыласының екпінін дер кезінде тоқтатып, жекпе-жекті өз ырғағына түсіре алды.
Нәтижесінде алғашқы раундта төрешілер басымдықты Досжан Жұмақанға 3:2 есебімен берді.
Екінші раундта да Жұмақан сенімді қимылдап, ұпай бойынша алға шықты. Ол қарсыласына еркіндік бермей, жекпе-жек тізгінін өз қолында ұстады.
Шешуші үшінші раундта да төрешілер қазақстандық былғары қолғап шеберін мықты деп таныды. Осылайша Досжан Жұмақан финалда жеңіске жетіп, турнир чемпионы атанды.
Бұл жеңіс Қазақстан құрамасы үшін Бангкоктегі жарыстағы екінші алтын медаль болды.
