Қазақстандық боксшы АЧ финалында Қырғызстан өкілін бір минутта нокаутқа түсірді (ВИДЕО)
Осылайша, Самал Төлепберген Азия чемпионатының алтын медалін иеленді.
Ташкентте өтіп жатқан бокстан U15 жас санатындағы Азия чемпионатында Қазақстан құрамасы кезекті алтын медальға қол жеткізді. 52 келіге дейінгі салмақта ел намысын қорғаған Самал Төлепберген финалда сенімді жеңіске жетті.
Шешуші жекпе-жекте қазақстандық боксшы Қырғызстан өкілі Арузат Маликовамен кездесті. Алайда бұл айқас ұзаққа созылған жоқ.
Финал бір минутта аяқталды
Самал Төлепберген финалдық кездесудің алғашқы минутында-ақ қарсыласын нокаутқа түсірді. Осылайша қазақстандық спортшы төрешілер шешімін күтпей, айқын басымдықпен жеңіске жетті.
Ташкенттегі Азия чемпионаты қалай өтіп жатыр?
U15 жас санатындағы Азия чемпионаты Өзбекстан астанасы Ташкентте ұйымдастырылып жатыр. Жарыс Asian Boxing ұйымының қолдауымен өтуде. Бұл ұйым World Boxing құрылымының Азиядағы бөлімшесі саналады.
Биылғы құрлық біріншілігі соңғы жылдардағы ең ауқымды жарыстардың бірі болды. Турнирге Азияның 21 елінен 460-тан астам жас боксшы қатысып жатыр.