Қарсыласының жақ сүйегін сындырған файтер Еркебұлан Тоқтарды октагонға шақырды
Қазақстандық ММА файтері Еркебұлан Тоқтар өзбекстандық Абдумалик "Абби" Ербутаевтың жекпе-жек өткізу туралы ұсынысына әзірге жауап берген жоқ.
Ербутаевтың шақыруы жауапсыз қалды
"Солай де/UFC" телеграм-арнасының мәліметінше, Абдумалик Ербутаев қазақстандықты бұған дейін октагонға шақырған. Бірақ Еркебұлан Тоқтар тарапынан ресми жауап болмаған.
"Абдумалик Ербутаев Еркебұланды бұған дейін жекпе-жекке шақырғанымен ұсыныс жауапсыз қалды. Шовхалмен өтетін кездесуге қарағанда Абдумаликпен Өзбекстанда ұйымдастырылатын айқас әлдеқайда қызықты болар еді", — деп жазды дереккөз.
Тоқтар Шовхал Чурчаевпен кездесуге дайын
Бұған дейін ресейлік поп-ММА өкілі Шовхал Чурчаев әлеуметтік желідегі парақшасында Еркебұлан Тоқтармен жұдырықтасуға келісім бергенін мәлімдеген.
Оның айтуынша, екеуінің кездесуі IBA Nomad Fighting промоушенінің аясында 9 қазанда өтуі мүмкін. Кейін Еркебұлан Тоқтар ресейлік файтердің мәлімдемесіне жауап беріп, аталған жекпе-жекке дайын екенін аңғартты.
Абдумалик Ербутаев кім?
Абдумалик "Абби" Ербутаев жеңіл және жартылай орта салмақ дәрежелерінде өнер көрсетеді. Өзбекстандық файтер қазақстандық OCTAGON лигасындағы жекпе-жектері арқылы кеңінен танылған.
Сонымен қатар Nomad FC, Hype FC және PRIME FL промоушендерінің турнирлеріне қатысқан. Ербутаев жанкүйерлер арасында харизмасымен, ерекше мінез-құлқымен және тік тұрып айқасудағы агрессивті стилімен танымал.
Оның мансабындағы ең есте қалған кездесулердің бірі Алматыдағы IBA Nomad 15 турнирінде болды. Сол жекпе-жекте Ербутаев қазақстандық Әділжан "Адос" Сәндібековты бірінші раундтың алғашқы секундтарында ауыр нокаутқа түсірді.
Жекпе-жектен кейін қазақстандықтың жақ сүйегі сынғаны хабарланған.