Ирландиялық боксшы жекпе-жектен кейін үш айдан соң қайтыс болды
Кәсіпқой боксшы Ли Ривз 31 жасында өмірден өтті. Тамыздағы жекпе-жекте басынан ауыр жарақат алған боксшы үш айдан астам уақыт дәрігерлердің бақылауында болған.
Ли Ривзге не болды?
Боксшының қайтыс болғанын Queensberry промоутерлік компаниясы хабарлады. Ривз 16 қарашада жақындарының ортасында көз жұмған.
Ол 2026 жылғы 1 тамызда Дублиндегі 3Arena аренасында Гэри Каллимен жұдырықтасқан. Бірінші жартылай орта салмақта өткен кездесудің оныншы раундында Ривз екі рет нокдаунға түсіп, кейін есінен таныған.
Боксшыны рингтен зембілмен алып шығып, ауруханаға жеткізген. Дәрігерлер ауыр бас-ми жарақатын анықтап, шұғыл операция жасаған. Содан кейін боксшы жасанды комада болған.
Жағдайының жақсарғаны туралы хабарлар үміт сыйлаған
Қазан айында Ривзді отбасына жақын болуы үшін Дублиндегі ауруханадан Лимерик университеттік ауруханасына ауыстырған. Осы аралықта оның жағдайында аздаған оң өзгерістер байқалғаны хабарланған. Бірақ қарашада боксшы инфекция жұқтырып, ағзасы оған төтеп бере алмаған.
Лимерикте өскен Ли Ривз кәсіпқой рингте 18 кездесу өткізіп, 16 жеңіске жеткен. Кәсіпқой боксқа ауысқанға дейін әуесқойлар арасында бес рет Ирландия чемпионы атанған.
Ол спорттан бөлек бірнеше салада өзін сынаған:
- 2024 жылы әскери даярлықтан өтіп, Ирландия армиясының 12-батальонында қызмет еткен;
- модель болып жұмыс істеп, Nike брендімен әріптестік орнатқан;
- психологиялық қиындықтарға тап болған адамдарға көмектесетін Limerick Treaty Suicide Prevention ұйымының қызметіне қатысқан.