Оның қарсыласы 28 рет жеңіске жеткен поляк боксшысы болады.
Екінші жартылай жеңіл салмақта жұдырықтасатын қазақстандық боксшы Сұлтан Заурбектің (18-0, 13 КО) келесі жекпе-жегі қашан өтетіні белгілі болды.
BoxRec.com сайтының мәліметі бойынша, Заурбек 7 желтоқсанда Ирландияның Уотерфорд қаласында жұдырықтасады. Оның қарсыласы — кәсіпқой бокста 28 рет жеңіске жеткен поляк Дамиан Вржесинский (28-3-2, 7 КО) болады.
Айта кетейік, Сұлтан өзінің соңғы жекпе-жегін 21 маусымда Англияның Болтон қаласында өткізіп, бірінші раундта техникалық нокаутпен жеңіске жетті. Сөйтіп WBA Continental белбеуіне ие болды.
Ал Дамиан Вржесинский болса, 5 қазанда Польшаның Злотов қаласында өткен жекпе-жекте аргентиналық Мауро Алекс Перуэнеден (16-9-1, 8 КО) басым түсті.
