Америкалық боксшы Кишон Дэвис (13-0, 9 КО) WBO нұсқасы бойынша жеңіл салмақтағы жаңа әлем чемпионы атанды. Нью-Йоркте (АҚШ) өткен бокс кешінің басты жекпе-жегінде ол украиналық чемпион Денис Беринчикті (19-1, 9 КО) жеңді.
12 раундқа есептелген жекпе-жек төртінші раундта аяқталды. Америкалық боксшы қарсыласын денесіне жасалған ауыр соққымен нокаутқа түсірді. Бұған дейін үшінші раундта да Беринчик дәл осындай соққыдан нокдаунға түскен еді.
36 жастағы Беринчик бұл кездесуге дейін жеңілмей, алғаш рет чемпиондық титулын қорғауға шыққан. Ал 25 жастағы Дэвис кәсіпқой мансабындағы 13-ші жеңісіне қол жеткізіп, алғаш рет әлем чемпионы атағын иеленді.
Айта кетейік, 2012 жылы Беринчик Лондонда өткен Олимпиада ойындарында 64 келіге дейінгі салмақта күміс жүлдегер атанған. Финалда ол кубалық Роньель Иглесиасқа жол берді. Ал Дэвис 2020 жылғы Токио Олимпиадасында күміс жүлдеге ие болып, финалда кубалық Энди Крусқа есе жіберген.
