Қазақстандық кәсіпқой боксшы Жәнібек Әлімханұлы доминикандық Карлос Адамес (24-1-1, 18 КО) пен британдық Хамза Шираз (21-0-1, 17 КО) арасындағы жекпе-жектің нәтижесіне өз ойын білдірді.
Орта салмақтағы әлем чемпионы атағы сарапқа салынған жекпе-жек жанжалмен аяқталды.
"Бұл не болды? Карлос? Ол – қорқақ! Мен оны нокаутқа түсіремін! Бірақ ол менімен жекпе-жекке шықпайды. Рафаэль, боксшыңа менімен кездесуді айт! Егер сен чемпион болсаң, чемпиондармен жұдырықтас! Сен – қорқақсың! Сенің соққың мықты емес! Мен сені оңай нокаутқа жіберемін!" – деп жазды Әлімханұлы әлеуметтік желіде.
Айта кетейік, Сауд Арабиясының Эр-Рияд қаласында өткен Карлос Адамес пен Хамза Шираз арасындағы жекпе-жек күтпеген жерден тең нәтижемен аяқталды. Бұл шешім көрермендердің наразылығын тудырды.
Кездесудің фавориті Хамза Шираз болғанымен Адамес тең нәтижеге қол жеткізіп, WBC тұжырымы бойынша орта салмақтағы әлем чемпионы белбеуін сақтап қалды. Енді Жәнібек Әлімханұлының келесі ықтимал қарсыласы ретінде доминикандық боксшы қарастырылып отыр.
