Халықаралық бокс қауымдастығының басшысы тиісті келіссөздер басталып кеткенін мәлімдеді.
Дмитрий Бивол мен Артур Бетербиев арасындағы үшінші жекпе-жек Мәскеудің «Лужники» стадионында өтуі мүмкін. Халықаралық бокс қауымдастығының (IBA) басшысы Умар Кремлев осындай ниет білдірді. Бұл туралы sportmk.ru хабарлады.
«Біз үшінші жекпе-жекті ұйымдастыруымыз керек. Бивол мен Бетербиев – орта салмақтағы үздік боксшылар. Бағасы қанша болса да, Мәскеуде «Лужники» стадионында 100 мың көрермен алдында айқас өткіземіз. Тиісті келіссөздерді бастап кеттік», – деді Кремлев.
Бұл ұсыныс екі боксшы арасындағы текетірестің қаншалықты маңызды екенін тағы бір дәлелдеді. Бивол мен Бетербиев арасындағы алғашқы екі жекпе-жек жанкүйерлер мен сарапшылардың жоғары бағасына ие болды.
Айта кетейік, өткен сенбіде Сауд Арабиясының Эр-Рияд қаласында өткен жекпе-жекте Дмитрий Бивол төрешілердің шешімімен Бетербиевтен басым түсіп, барлық негізгі белбеулерді (WBC, WBA, WBO, IBF) жеңіп алды.
Бивол жекпе-жек барысында тактикалық артықшылығын көрсетіп, Бетербиевтің соққыларынан сытылып кете білді. Қорытынды есеп: 114:114, 116:112 және 115:113.
