Қазақстан таэквондодан 2027 жылғы әлем чемпионатын өткізуге үміткер болуы мүмкін. Бұл туралы отандық WT таеквондо федерациясының президенті Құдырет Шәмиев ұлттық құраманың бірлескен жиынында айтты.
Отандық WT таэквондо федерациясының президенті Құдырет Шәмиев Қазақстан таэквондодан 2027 жылғы әлем чемпионатын қабылдауға мүдделі екенін айтты.
"2014 жылдан бері Қазақстанда таэквондодан әлемдік жарыстар өтпеген. Бірінші кезекте бұл біздің оқшауланып қалғанымызды білдіреді. Спорт бар жерде саясат та бар. Сол саясат шеңберінен тым алыста жүрмегеніміз дұрыс. Сондықтан біз өз елімізде World Taekwondo аясында өткізілетін ірі жарыстарды қабылдауға толық дайынбыз. Атап айтар болсақ, тамыз айында Kazakhstan Open турнирін жоғары дәреже өткізетін жоспарымыз бар. Бұл бәсекеге әлемдік таэквондодағы беделді тұлғалар мен чемпиондар шақырылады”, – деді Шәмиев.
Бұдан бөлек Қазақстан 2026 жылы таэквондодан Гран-при турнирін өткізуге үміткер ретнде қарастырылып жатыр. Федерация тиісті құжаттарды түгел дайындап, әлемдік ұйымға жіберген.
