UFC Fight Night 253 турнирінде өткен жекпе-жекте Асу Алмабаев анголалық Манел Капеден техникалық нокаутпен жеңіліп қалған еді.
UFC барлық дивизиондар бойынша жаңартылған рейтингтерін жариялады. Қазақстандық файтер Асу Алмабаев алғаш рет жеңіліс тапқаннан кейін өз орнынан төмендеп қалды.
2 наурыз күні Лас-Вегас қаласында (АҚШ, Невада штаты) UFC Fight Night 253 турнирінде өткен жекпе-жекте Асу Алмабаев анголалық Манел Капеден техникалық нокаутпен жеңіліп қалды. Соның кесірінен отандасымыз сегізінші орыннан тоғызыншы орынға тұрақтады.
Алмабаевтың орнына австралиялық Стив Эрцег көтерілді, ал Манел Капе өз орнын сақтап, алтыншы позицияда қалды. Дивизионның чемпионы ретінде әзірге бразилиялық Алешандре Пантожа тұр.
Жекпе-жек барысында даулы жағдайлар да орын алды. Үшінші раундта Манел Капе қарсыласының көзіне байқаусызда саусағымен тигізген сәттен кейін жанкүйерлер арасында үлкен талқы болды. Бұл жағдайдың әділдігіне қатысты сұрақтар туындап, жанкүйерлер екіге бөлінді.
Асу Алмабаев үшін бұл UFC-дегі алғашқы жеңіліс болғанымен, оның келесі жекпе-жектерінде өз орнын қайтару мүмкіндігі жоғары. Сарапшылар оның әлеуетін жоғары бағалап, алдағы уақытта мықты қарсыластармен кездесетінін болжауда.
