UFC және WWE құрамына кіретін TKO Group компаниясы Сауд Арабиясының Бас ойын-сауық басқармасымен жаңа бокс промоушенін құру туралы көпжылдық келісім жасады.
Бұл жаңалықты UFC президенті Дана Уайт пен Сауд Арабиясының ойын-сауық индустриясын басқаратын Турки Аль аш-Шейх арнайы видео арқылы жариялады.
Дана Уайт жаңа лиганың жанкүйерлердің қалауын ескеретін және үздік боксшылар арасындағы нағыз айқастарды ұйымдастыратын жоба болатынын айтты:
"Біздің басты мақсатымыз – жанкүйерлерге олар көргісі келетін жекпе-жектерді ұсыну. Ең мықтылар бір-бірімен кездесіп, нағыз чемпиондар анықталады. Бұл – бокстағы жаңа дәуірдің бастауы", – деді Уайт.
Бұл бастама әлемдік боксқа жаңа серпін беріп, мықты жекпе-жектердің жиі өтуіне ықпал етуі мүмкін. Ал Сауд Арабиясы соңғы жылдары жаһандық спорт индустриясындағы ықпалын күшейтіп келеді.
