Жәнібек Әлімханұлының жаттығу лагеріне әйгілі америкалық бапкер қосылды (ВИДЕО)

WBO және IBF тұжырымы бойынша әлем чемпионы Жанибек Алимханулы (16-0, 11 КО) алдағы титулдық жекпе-жегіне қызу дайындық үстінде.

5 сәуірде Астанада «Қазақ стилі» франциялық Анауэль Нгамиссенгемен (14-0, 9 КО) қолғап түйістіреді. Бұл кездесу Қазақстан тарихында тұңғыш рет екі чемпиондық белбеу сарапқа салынатын жекпе-жек болмақ.

Ломаченконың бұрынғы бапкері

Жәнібек әлеуметтік желідегі парақшасында спарринг-жаттығу сәттерін бөлісіп, АҚШ-тан келген атақты бапкер Марко Контрерастың командаға қосылғанын хабарлады.

«5 сәуірге дайындық қызу жүріп жатыр! Америкадан Марко бапкер келіп, Qazaq style-ды шыңдап жатырмыз!», - деп жазды Әлімханұлы.

Контрерас әлемге танымал Василий Ломаченко, Александр Гвоздик, Эгидиюс Каваляускас секілді мықты боксшылармен жұмыс істеген тәжірибелі маман.