Олимпиада чемпионы, ауыр салмақтағы әлемнің экс-чемпионы және тарихтағы ең танымал боксшы Джордж Формэн 76 жасында өмірден озды
АҚШ-тың аңызға айналған боксшысы, Олимпиада жеңімпазы және ауыр салмақтағы екі дүркін әлем чемпионы Джордж Формэн 76 жасында қайтыс болды. Бұл туралы оның отбасы TMZ басылымына растады.
“Бізге көрсетілген махаббат пен тілектерге алғысымызды білдіреміз. Біз осы ерекше адамның өмірін еске алып жатқанда, тыныштықта қалуды сұраймыз”, – деді Формэнның туыстары.
Джордж Формэн 1949 жылдың 10 қаңтарында дүниеге келген. Ол бар болғаны 25 жекпе-жектен кейін әуесқой бокс тарихындағы ең үлкен жетістікке жетіп, 1968 жылы Мехикода Олимпиада чемпионы атанды.
Келесі жылы, 1969 жылы ол кәсіби рингке шықты. Ал екі жылдан кейін WBA және WBC тұжырымдары бойынша №1 үміткер атанды.
1973 жылы Формэн кәсіби мансабындағы ең ірі сәттердің біріне қол жеткізді. Оның рекорды – 37 жеңіс, 35 нокаут. 22 қаңтарда ол Кингстон қаласында Джо Фрейзермен жұдырықтасып, екінші раундта 6 рет нокдаунға түсіріп, қарсыласын сенсациялық түрде жеңді. Осылайша ол әлем чемпионы атанды.
1974 жылы Формэн бокс тарихындағы ең есте қаларлық жекпе-жектердің біріне қатысты. Бұл жекпе-жек “Джунглидегі дүбір” (Rumble in the Jungle) деп аталып кеткен. Ол жерде Формэн мен Мұхаммед Әли рингте кездесіп, 8-раундта Әли нокаутпен жеңіске жетті.
1977 жылы Форман Джимми Янгтан жеңіліп, бокстан кететінін мәлімдеді. Ол сол кезеңнен кейін діни жолға бет бұрып, шіркеу қызметкері атанды.
Алайда, қаржылық қиындықтар салдарынан Формэн 10 жылдан кейін рингке қайта оралды.
1994 жылы, Формэн 45 жасында қайтадан әлем чемпионы атағына қол жеткізді. Бұл оны ең егде жастағы чемпион ретінде тарихқа енгізді.
1997 жылы ол кәсіби бокспен біржола қоштасты.
