Астанада өтетін кәсіпқой бокс кешіне небәрі 10 күн қалғанда қазақстандық жас боксшы Махмұд Сабырхан қарсылассыз қалды.
Бұған дейін Сабырханның Филиппиннен келген Джеи Фрэнсис Бураймен (13-3-1, 3 КО) жұдырықтасатыны белгілі болған. Бірақ соңғы мәліметтерге сәйкес, Бурай Астанаға келуден бас тартқан.
Бұл жағдай Махмұдтың кәсіпқой рингтегі алғашқы жекпе-жегінің тағдырына қауіп төндіріп отыр. Қазір кеш ұйымдастырушылары жаңа қарсылас іздеп жатыр.
Сол кеште рингке шығуы тиіс болған тағы бір қазақ спортшысы — Балауса Муздыманның да қарсыласы ауысты. Алғашында ол жеңіліп көрмеген америкалық Розалинда Родригеспен (14-0, 3 КО) жұдырықтасуы керек еді. Бірақ BoxRec.com-дағы соңғы ақпаратқа сай, енді Балауса филиппиндік Мария Тереза Пинилимен (7-1, 2 КО) кездеседі. Жекпе-жек жеңіл салмақтағы 8 раундқа жоспарланған.
Қарсыластың ауыстырылу себебі ресми түрде хабарланған жоқ.
Айта кетейік, 5 сәуір күні өтетін бұл кештің басты оқиғасы — орта салмақтағы әлем чемпионы Жәнібек Алимханұлының (16-0, 11 КО) WBO және IBF белбеулерін қорғау жолындағы жекпе-жегі. Ол француз Анауэль Нгамиссенгемен (14-0, 9 КО) кездеседі.
