Кәсіпқой бокста өз есімін қалыптастырып келе жатқан қазақстандық боксшы Виктор Темиров (6-0, 4 KO) сәуір айында Германияда кезекті жекпе-жегін өткізеді.
24 жастағы қазақстандық боксшы Квакенбрюк (Германия) қаласында өтетін кештің аясында поляк спортшысы Матеуш Павловскимен (3-4, 2 KO) қолғап түйістіреді. Жекпе-жек бірінші орта салмақта өтіп, алты раундқа жоспарланған.
Жекпе-жекті ұйымдастырушылар шоуға қатысты афиша мен ресми анонсты жариялап үлгерді. Бұл Темировтің Еуропадағы танымалдығының артқанын көрсетеді.
Қазақстанда “Қасапшы” деген лақап атпен танымал Темиров Германияда “Жас Головкин” атанып кеткен. Себебі ол да Геннадий Головкин секілді кәсіби мансабын дәл осы елде бастап, жарқын жеңістермен көзге түсіп келеді.
