Ганада өткен кәсіби бокс кешінде қайғылы жағдай болды. 40 жастағы нигериялық боксшы Габриэль Олувасегун Оланреваджу жекпе-жек кезінде есінен танып, артынша ауруханада қайтыс болды.
Қайғылы оқиға Bel 7Star Ghana Professional Boxing League турнирінде тіркелді. Рингке 40 жастағы Габриэль Оланреваджу мен 22 жастағы Джон Мбанугу шыққан.
Жекпе-жектің үшінші раундында қарсы шабуылдардан кейін Габриэль кенет артқа шегініп, тепе-теңдігін жоғалтып құлады. Рефери Ричард Амеви жағдайдың ауырлығын бірден түсініп, міндетті санауды тоқтатты және шұғыл түрде дәрігер мен жедел жәрдем қызметін шақырды.
Жедел көмек көрсетілгенімен боксшыны аман алып қалу мүмкін болмады. Ол ауруханаға жеткізілгеннен кейін көз жұмды.
Гана Бокс басқармасы (GBA) мен турнир ұйымдастырушысы Osibor Boxing Promotions болған оқиға бойынша барлық қажетті материалдарды полицияға тапсырғандарын және тиісті мемлекеттік органдарды хабардар еткендерін мәлімдеді.
Боксшының нақты өліміне себеп болған жағдайлар арнайы сараптама арқылы анықталмақ.
Марқұм Габриэль Олувасегун Оланреваджу Нигерияда дүниеге келген. Ол кәсіби бокста 13 жеңіс, 8 жеңіліс және 2 тең нәтижемен танылған. Рингтегі кәсіби мансабын 2019 жылдың шілдесінде бастаған.
Габриэль Нигериядағы ең мықты боксшылар рейтингінде жетінші орынды иеленген.
