ҚР Көлік министрлігінің бұйрығына сәйкес, 2025 жылдың 13 мамырынан бастап республикалық маңызы бар "Шу – Бурылбайтал" автожолының бір бөлігі ақылы жүйеге көшеді. Бұл туралы "ҚазАвтоЖол" ұлттық компаниясы хабарлады.
Ақылы жол учаскесі 92,2-268 шақырым аралығын қамтиды. Жалпы ұзындығы – 175,8 шақырым. Жол ІІ-техникалық санатқа жатады: әр бағытта бір жолағы бар, ал қозғалыс жолағының ені – кемінде 3,75 метр.
Жүргізушілерге ыңғайлы болу үшін балама тегін жол қарастырылған. Ол "Шу – Қайнар – Кенен – Қарабастау – Қаншеңгел – Ақсүйек – Бурылбайтал" бағыты арқылы өтеді.
Аталған жол бөлігінде жеңіл автокөліктер үшін ақы алынбайды. Ал автобус және жүк көліктері үшін айлық немесе жылдық абонемент түрінде төлем жасау қарастырылған. Толық ақпарат пен жазылымды рәсімдеу үшін жүргізушілер 1403 нөміріне хабарласа алады.
Жүйенің икемділігі мақсатында алдын ала және кейінге қалдырылған төлем мүмкіндіктері қарастырылған. Төлемді екінші деңгейлі банктердің мобильді қосымшалары арқылы онлайн түрде жүзеге асыруға болады.
