Автогаз бағасын тағы да көтеру ұсынылды

Қазақстан Энергетика министрлігі сұйытылған мұнай газының (СМГ) көтерме және бөлшек бағасын арттыруды ұсынды. Тиісті бұйрық жобасы «Ашық НҚА» порталында жарияланды, деп хабарлайды NUR.KZ.

Баға неге көтеріледі?

Министрліктің мәліметінше, СМГ өндірудің қазіргі шығындары өзін-өзі ақтамай отыр. Қазіргі уақытта:

• Өндірістік өзіндік құн: 70–80 мың теңге/тонна
• Шекті көтерме баға: 51 932 теңге/тонна

Осы алшақтық газ өндіруші зауыттардың қаржылық тұрақтылығына кері әсер етіп отыр.

“Бұл шара ішкі нарықты толық көлемде қамтамасыз етуге, сондай-ақ газ өңдеу саласына инвестиция тартуға қолайлы жағдай жасауға бағытталған”, - деп түсіндірді министрлік өкілдері.

Газ тұтыну қарқыны артып жатыр

Сұйытылған газға сұраныс жылдан жылға артуда:

• 2022 жылы — 1,8 млн тонна
• 2024 жылы — 2,4 млн тонна
• 2025 жылға болжам — 2,6 млн тонна

Сарапшылардың айтуынша, ішкі нарықта 30–40% көлемінде тапшылық туындауы мүмкін.

Жаңа шекті бағалар қандай болады?

Жаңа бұйрық жобасына сәйкес:

• Көтерме баға: 51 932 теңгеден → 59 722 теңгеге дейін өседі
• Бөлшек баға аймақтарға байланысты 7–10 теңгеге артады

Әр өңір бойынша автогаздың (СМГ) ұсынылған жаңа бағалары төмендегідей. 

Бағасы 77 теңгеден 85 теңгеге дейін өсетін өңірлер:

• Ақтөбе облысы
• Атырау облысы
• Батыс Қазақстан облысы (БҚО)

Бағасы 102 теңгеден 112 теңгеге дейін өсетін өңірлер:

• Ақмола облысы
• Алматы облысы
• Павлодар облысы
• Абай облысы
• Жетісу облысы
• Ұлытау облысы
• Шығыс Қазақстан облысы (ШҚО)
• Солтүстік Қазақстан облысы (СҚО)

Бағасы 90 теңгеден 102 теңгеге дейін өсетін өңірлер:

• Жамбыл облысы
• Қызылорда облысы
• Түркістан облысы
• Шымкент қаласы

ТМД елдерімен салыстырғанда

Энергетика министрлігі өкілдерінің айтуынша, Қазақстандағы автогаз бағасы ТМД аумағындағы ең төмен деңгейде қалып отыр. Бұл фактор да баға өсімінің бір себебі ретінде көрсетілген.