Мұнай-газ саласының сарапшысы және Энергетика министрлігінің бұрынғы Қоғамдық кеңес мүшесі Олжас Байділдинов елдегі қоғамдық көлік тарифін 500 теңгеге дейін көтеру қажет деп санайды. Оның айтуынша, Астана мен Алматыдағы автопарктер шығынмен жұмыс істеп жатыр, ал қазіргі тарифтер олардың нақты шығынын өтемейді.
Байділдинов Петропавлда автобустардың шығынсыз жүру құны — шамамен 345 теңге екенін айтты. Бірақ тұрғындар небәрі 100 теңге (қолма-қолсыз төлемде) және 170 теңге (қолма-қол төлемде) төлейді.
«Мен бұл туралы бұрыннан айтып келемін: бұл саладағы мемлекеттік субсидиялар — ашық емес және жемқорлық тәуекелі жоғары жүйе. Олар халыққа сапа әкеліп жатқан жоқ. Астана мен Алматыда жол ақысы 500 теңге болуы тиіс (мәслихат отырыстарында 450 теңге деңгейі аталған). Тек Алматының өзінде былтыр автобус субсидиясына шамамен 200 миллион доллар бөлінді. Ал нәтиже қандай?» — деп жазды сарапшы.
Олжас Байділдиновтің пікірінше, қоғамдық көлік жолаушылары үшін қашықтыққа байланысты сараланған тариф енгізу қажет.
«Үш аялдама жүрген адам мен соңғы аялдамаға дейін 1,5 сағат жол жүретін жолаушының бірдей ақы төлеуінде ешқандай экономикалық логика жоқ. Автобус парктеріне арналған жасанды және жабық субсидияларды жойып, нарықтық тариф жүйесіне көшу керек. Ерте ме, кеш пе — бәрібір соған келеміз», — дейді ол.
Сарапшы бұған дейін де қоғам назарында болған. 2022 жылғы қаңтар оқиғалары кезінде ол сұйытылған газ бағасының өсуіне байланысты пікір білдіріп, «бағаға наразы болғандар қоғамдық көлікке отырсын» деген мәлімдемесімен есте қалған еді. Сол кезде ол:
«15–20 теңгеге қымбаттау — елеусіз сома. Біз интернетке одан да көп төлейміз», — деген болатын.
