Қазақстанның халық әртісі, әлемге танымал әнші Димаш Құдайберген әлеуметтік желідегі күлкілі пікірлер мен мемдерге қатысты өз ойын білдірді.
Димаш өзінің соңғы туындысы – “Бір аспанның тарихы” атты шығармасына қатысты әлеуметтік желілерде қазақстандықтар белсенді түрде пікір білдіріп жатқанын атап өтті.
“Егер сені әжуаласа – бұл сенің тірі екеніңнің, елге қызық екеніңнің белгісі. Қымбатты жерлестерім, креативті қалжыңдарыңыз бен назарыңыз үшін алғыс білдіремін – ол қандай формада болса да”, – деп жазды Димаш.
Әнші өз сөзінде әлемнің түкпір-түкпіріндегі жанкүйерлеріне де ерекше ризашылығын білдірді:
“Мені үнемі қорғап, шынайылық пен мейірімділікті қолдайтындарыңыз үшін мың алғыс. Сіздердің әр сөзіңіз – мен үшін әуенмен тең”, – деді ол.
Сонымен қатар, Димаш мамыр айының соңында Алматыда өтетін фан-кездесуге тыңдармандарын шақырды. Бұл жаңалық өнер иесінің жанкүйерлері үшін үлкен қуаныш болды.
