Бозбала жаттығу залында «Балқадиша» әнін орындап, мыңдаған көрермен жинады.
Атырау қаласының жас спортшысы TikTok желісінде күтпеген жерден танымал болды. Ол дзюдо жаттығуынан кейін қазақтың әйгілі әні «Балқадишаны» орындап, желіні «жарды».
Видеода жас спортшы жаттығу залында достары мен жаттықтырушысы алдында ән айтады. Белгілі болғандай, бала жаттықтырушысымен бәстесіп, жеңіліп қалған соң ән айтуы керек болған. Бұл – әзіл ретінде ойластырылған «жаза» еді, бірақ ол керісінше – үлкен шабытқа айналды.
Видео TikTok-та бір апта ішінде 1 миллионға жуық қаралым жинап, мыңдаған пікір мен лүпілге ие болды.
Әлеуметтік желіде жарияланған бейнежазба астында қолданушылар жас спортшының өнеріне тәнті болып, жылы лебіздерін аямады. Жас әншінің дауысын жоғары бағалап, талантын ерекше атап өтті.
«Балқадиша» – қазақтың классикалық әндерінің бірі. Жас спортшының орындауындағы бұл нұсқасы заманауи аудиторияға жаңаша серпін беріп, ұлттық өнердің жастар арасында танымал екенін дәлелдеді.
