Қазақстандық танымал актриса, продюсер және әнші Әсел Сәдуақасова қазіргі өмірін Индонезиядағы Бали аралында өткізіп жүр. "Келинка тоже человек" фильмінен кейін халыққа жақсы таныс болған әртіс бұл өмір салтының оған ішкі тыныштық пен тепе-теңдік әкелгенін жасырмады.
Жақында жолдасынан ресми түрде ажырасып шыққан Әсел Сәдуақасова өз сөзінде Балидегі жайлы және бірқалыпты өмір ырғағы оны тыныштандырып, өмірге деген көзқарасын өзгерткенін жеткізді:
“Қазіргі өмір салтым өзіме қатты ұнайды. Қарапайым, бірсарындылыққа толы, кейде тіпті іш пыстырарлықтай күнделікті тірлік мен үшін нағыз рахат. Эмоциялық күйзелістер мен жүйкенің таусылуынан кейін мен үшін ең қымбат нәрсе — бұл жан тыныштығы”, — дейді ол.
Әселдің айтуынша, бұрынғыдай қарбалас өмір емес, қазір ол жан мен тән саулығына ерекше көңіл бөледі. Ол күнделікті йогаға барып, мұздай ваннада шынығып, табиғат аясында жалғыздықта уақыт өткізуді әдетке айналдырған. Мұндай өзгерістер оның өмір сүру философиясын мүлде өзгертті:
“5 жыл бұрын маған біреу осындай өмір салтын ұнатасың десе — күліп қана қоятын едім”, — деп ағынан жарылды Сәдуақасова.
Желіде танымал әртіс бірнеше мәрте Балидегі таңғы сәттерін бөліскен болатын. Табиғатпен үндескен тыныш әрі ойға берілетін өмір салты көп оқырманды қызықтыруда.
